वैवाहिक बलात्कार र डिभोर्स मुद्दा मेलमिलापमा गएपछि बाटो ढुकेर पत्नीको हत्या

काठमाडौँ । सैनिक सुबेदार ईश्वरी भुजेलले पतिसँग डिभोर्सका लागि अदालतमा मुद्दा दायर गरेकी थिइन् । २०८२ मङ्सिर १४ गते काठमाडौँ जिल्ला अदालतमा मुद्दा दर्ता भएर अदालती प्रक्रिया अघि बढ्दै थियो । 

गोरखा माइती भएर काठमाडौँको तारकेश्वर नगरपालिका–६, पैयुँटारमा दुई छोरासँग बस्ने ईश्वरीले आफ्ना श्रीमान् ‘नेपाली ब्रो’ भनेर चिनिने कुमार थापाविरुद्ध वैवाहिक बलात्कारको जाहेरी पनि दिएकी थिइन् ।

बलात्कारको जाहेरीमाथि प्रहरीले अनुसन्धान गरेर २०८२ भदौ १० मा सरकारी वकिलमार्फत अभियोग दायर गरेको थियो । उनीहरू दुवै जना ४२ वर्षका थिए । पतिसँग छुट्टिन ईश्वरी दुवै मुद्दाको छिटो फैसला चाहन्थिन् ।

‘नेपाली ब्रो’ भन्थे : मेरो हातबाट कसैको ज्यान नजाओस्, तर आफ्नै श्रीमतीको हत्या गरे
२०८३ जेठ २० मा काठमाडौँ जिल्ला अदालतका न्यायाधीश डा. दिवाकर भट्टको इजलासमा दुईवटै मुद्दाको पेसी थियो । न्यायाधीश भट्टले दुवै मुद्दा मेलमिलापमा पठाउने आदेश गरे । तर, मेलमिलाप केन्द्रमा बसेर छलफल गर्नुअघि नै कुमार थापाले पत्नी ईश्वरीको हत्या गरे । प्रेमविवाह गरेका कुमारले जेठ २२ मा राति बाटो ढुकेर पत्नीको हत्या गरेका हुन् ।

कार्यालयबाट स्कुटरमा घर पुग्न लागेकी थिइन्, बाटो ढुकेर बसेका कुमारले उनलाई झम्टिए । राति १० बजेर १० मिनेटमा इँटा, ढुङ्गा र धारिलो हतियार प्रहार गरेर कुमारले ईश्वरीको हत्या गरेका हुन् । घरायसी विवादमा उनको हत्या भएको प्रारम्भिक अनुसन्धानबाट खुलेको जिल्ला प्रहरी परिसर काठमाडौँका एसपी पवन भट्टराईले  बताए ।

दम्पतीको विवादमा जोडिएर हत्यामा मतियारको भूमिकामा देखिएका थप ३ जना पक्राउ परेका छन् । पक्राउ पर्नेमा नुवाकोटको तारकेश्वर गाउँपालिका घर भएर पैयुँटार बस्ने ३६ वर्षीय विक्रम थापामगर, बालाजु घर भएका ४० वर्षीय पुजन थापा क्षेत्री र जुम्लाको हिमा गाउँपालिका–१ घर भएर गोकर्णेश्वर बस्ने २५ वर्षीया प्रतीक्षा आचार्य छिन् ।

मृतकका परिवारले दिएको किटानी जाहेरीका आधारमा उनीहरूलाई पक्राउ गरिएको एसपी भट्टराईले जानकारी दिए । पक्राउ परेकी प्रतीक्षा आचार्य पछिल्लो समय ‘नेपाली ब्रो’ सँग प्रेममा थिइन् । अनुसन्धानमा संलग्न प्रहरी वृत्त बालाजुका एक जना अधिकृत भन्छन्, ‘उहाँहरूको बिचमा प्रेम सम्बन्ध रहेछ ।’

ईश्वरीको हत्या गर्न ‘नेपाली ब्रो’ लाई प्रतीक्षाले पनि प्रोत्साहित गरेको आरोप छ । प्रतीक्षासहित ३ जनाको भूमिकाबारे प्रहरीले अनुसन्धान गरिरहेको छ ।

ईश्वरी र ‘नेपाली ब्रो’ को मुद्दा अदालतले मेलमिलापमा पठाए पनि अब त्यो च्याप्टर सकिएको छ । हरेक अदालतमा मेलमिलाप केन्द्र हुन्छ । न्यायाधीशले त्यहाँ पठाएका मुद्दा दुई पक्षको बिचमा छलफल र सहमति भएपछि मेलमिलाप हुन सक्छ । न्यायाधीशले मेलमिलाप हुन सक्ने प्रकृतिका मुद्दाहरूलाई मेलमिलाप केन्द्रमा पठाउन सक्छन् ।

पत्नीको हत्यापछि कुमार थापा विक्षिप्त छन् । विक्षिप्तताका कारण उनको बयान लिन पनि नसकिएको एसपी भट्टराईले बताए । उनले भने, ‘हाम्रा अधिकृतहरूले काम गरिरहेका छन्, बयान भएको छैन ।’

ईश्वरीको जाहेरीका आधारमा कुमार यसअघि पनि पक्राउ परेका थिए । २०८२ साउन २० मा प्रहरी वृत्त बालाजुले उनलाई वैवाहिक बलात्कार मुद्दामा पक्राउ गरेर अनुसन्धान गरेको थियो । त्यस बेला २१ दिन हिरासतमा बसेर उनी छुटेका थिए । त्यसपछि उनीहरूको बिचमा झनै कटुता बढेको थियो । घरझगडा रोकिएको थिएन ।

प्रहरी वृत्त बालाजुमा घरेलु हिंसाको निवेदन आउने र छलफल हुने प्रक्रिया जारी थियो । २०८२ भदौ २३ मा ‘जेन–जी’ आन्दोलन हुनुअघि पनि प्रहरीले दुवै जनालाई राखेर ‘शान्तिसुरक्षा’ सम्बन्धी कसुरमा छलफल गराएको थियो । प्रहरी वृत्त बालाजुका एक जना अधिकृतका अनुसार शान्तिसुरक्षाको निवेदनमा छलफल भएर मिलापत्र भएको थियो । हत्या अनुसन्धान गरिरहेका एक जना अधिकृत भन्छन्, ‘जेन–जी आन्दोलनअघि उहाँहरूको बिचमा हाम्रो कार्यालयमा बसेर छलफल र मिलापत्र भएको देखिन्छ ।’

एसपी पवन भट्टराई पनि घरेलु हिंसामा पटकपटक निवेदन आउने र कुराकानी भइरहेको बताउँछन् । उनी भन्छन्, ‘सो शृङ्खला बढ्दै जाँदा सम्बन्ध निकै कटुतापूर्ण अवस्थामा पुगेको देखिन्छ ।’

सेनामा झाँगिएको प्रेम
हत्या आरोपी कुमार थापा पनि पूर्वसैनिक हुन् । सेनाको जागिर छाडेर उनी खेलकुदमा लागेको अनुसन्धानमा संलग्न प्रहरी अधिकृतहरू बताउँछन् । अहिले उनी कुस्तीबाज ‘नेपाली ब्रो’ का रूपमा परिचित छन् ।

उनीहरूको चिनजान कुमार सेनामा हुँदा झन्डै २० वर्षअघि भएको थियो । १८ वर्षअघि उनीहरूले प्रेमविवाह गरेका हुन् । प्रेमविवाह विवादमा परिणत हुँदै हत्यामा टुङ्गिएको छ ।

ईश्वरीको हत्या गर्दा उनले प्रयोग गरेको धारिलो हतियार ‘चक्कु’ प्रहरीले बरामद गरेको छ । पोस्टमार्टम रिपोर्टअनुसार चक्कु प्रहारबाट ईश्वरीको घाँटी र ढुङ्गा प्रहारबाट टाउकोमा चोट लागेको भेटिएको छ । घटनास्थलमा कुमार मात्रै देखिएका छन् ।