२१ वर्षदेखि फरार सवारी ज्यान मुद्दाका आरोपी पक्राउ

पर्सा प्रहरीले २१ वर्षदेखि सवारी ज्यान मुद्दाका फरार एक आरोपीलाई पक्राउ गरेको छ । 

विशेष सूचनाका आधारमा प्रहरीको टोलीले घरमा लुकीछिपी बस्दै आएका फरार आरोपीलाई पक्राउ गरेको जनाएको छ । 

प्रहरीले जिल्लाको पर्सागढी नगरपालिका वडा नम्बर–५ निवासी ४७ वर्षीय दिनेश प्रसाद यादवलाइ पक्राउ गरेको पर्सा प्रहरी प्रमुख सुदिपराज पाठकले जानकारी दिए ।  

उनका अनुसार ०६२ सालको मंसिर १५ गते वीरगन्जको गण्डक चोकमा पैदल यात्रीलाइ ठक्कर दिएका थिए, त्यसपछि उपचारको क्रममा घाइते पैदल यात्री बारा जितपुर निवासी कालिका सिंह राजपुतको मृत्यु भएको थियो । सोही घटनापश्चात् फरार रहेका यादवलाई अहिले पक्राउ परेका प्रहरीले जनाएको छ । 

पक्राउ परेका यादवलाई जिल्ला प्रहरीको हिरासतमा राखी सवारी ज्यान मुद्दामा अनुसन्धान सुरु गरिएको पर्सा प्रहरीको कार्यालयले जानकारी दिएको छ ।