जङ्गली हात्ती मृत फेला

काठमाडौं । मोरङको सुन्दरहरैचामा जङ्गली हात्ती मृत फेला परेको छ ।

सुन्दरहरैचा नगरपालिका–६ दुर्गा मन्दिर नजिकै भक्तराज लिम्बुको केराको बगैँचामा फेला परेको छावा (बच्चा) बुधवार बिहान करिब ६ बजे मृत फेला परेको थियो ।

घटनाबारे स्थानीय र जनप्रतिनिधिले वन कार्यालय र प्रहरीलाई खबर गरेका थिए ।घटनास्थलमा लट्टीझोडा उपडिभिजन वन कार्यालय, साल्कपुर उपडिभिजन वन कार्यालय र गछिया प्रहरी चौकीको टोली घटनास्थल पुगेर अनुसन्धान गरिरहेको छ ।

वन कर्मचारी र प्रहरीको संयुक्त टोलीले घटनास्थलको सुरक्षा गरिरहेको लट्टीझोडा उपडिभिजन वन कार्यालयका प्रमुख तथा अधिकृत अमृत विलास पन्तले जानकारी दिए ।

करिब ६–७ वर्षको हात्तीको छावा (बच्चा) केराको बगैँचामा मृत अवस्थामा फेला परेको पन्तले बताए ।पोस्टमार्टम र थप अनुसन्धानपछि मृत्युको वास्तविक कारण खुल्नेछ ।