अमेरिका र इरानबीचको तनाव तथा युद्ध अन्त्य गर्ने उद्देश्यसहितको सम्झौता अन्तिम चरणमा पुगेको बताए

अमेरिकी राष्ट्रपति डोनाल्ड ट्रम्पले अमेरिका र इरानबीचको तनाव तथा युद्ध अन्त्य गर्ने उद्देश्यसहितको सम्झौता अन्तिम चरणमा पुगेको बताएका छन् ।

उनका अनुसार इरानमाथि गरिने भनिएको थप सैन्य कारबाही पनि हालका लागि रोकिएको हो ।

ह्वाइट हाउसमा सञ्चारकर्मीसँग कुरा गर्दै ट्रम्पले इरानले भविष्यमा आणविक हतियार विकास नगर्ने स्पष्ट प्रतिबद्धता जनाउनुपर्ने अमेरिकी अडान यथावत् रहेको बताए । उनले सम्झौतासम्बन्धी कागजातहरू लगभग तयार भइसकेको र निकट भविष्यमै औपचारिक रूपमा हस्ताक्षर हुन सक्ने संकेत दिए ।

ट्रम्पले सम्भावित सम्झौतापछि विश्वको प्रमुख तेल ढुवानी मार्ग मानिने हर्मुज जलमार्ग पूर्ण रूपमा सञ्चालनमा आउने विश्वास व्यक्त गरे । यसले अन्तर्राष्ट्रिय ऊर्जा आपूर्तिमा सकारात्मक प्रभाव पार्ने अपेक्षा गरिएको छ ।

यद्यपि, इरानले भने अमेरिकी पक्षको दाबीलाई तत्काल स्वीकार गरेको छैन । इरानी परराष्ट्र मन्त्रालयका प्रवक्ता इस्माइल बघाइले हालसम्म कुनै अन्तिम सहमति नभएको स्पष्ट पार्दै वार्ताका क्रममा अमेरिकाले थप नयाँ र कठोर मागहरू अघि सारेको आरोप लगाए ।

ट्रम्पको उक्त अभिव्यक्तिपछि अन्तर्राष्ट्रिय बजारमा कच्चा तेलको मूल्यमा उल्लेखनीय गिरावट आएको छ । अन्तर्राष्ट्रिय सञ्चारमाध्यमका अनुसार कच्चा तेलको मूल्य करिब ४.४ प्रतिशतले घटेर प्रतिव्यारेल ८९ अमेरिकी डलरमा पुगेको छ ।

यसैबीच, संयुक्त राष्ट्रसंघले मध्यपूर्व क्षेत्रमा बढ्दो तनावप्रति चिन्ता व्यक्त गर्दै सबै पक्षलाई युद्धविरामको पूर्ण पालना गर्न तथा परिस्थितिलाई थप जटिल नबनाउन आग्रह गरेको छ ।