सोमपालसँगै कर्णालीका सात खेलाडी ‘रिटेन’

कर्णाली याक्सले आगामी नेपाल प्रिमियर लिग (एनपीएल)का लागि सात खेलाडीलाई ‘रिटेन’ गरेको छ। 

शनिबार कर्णाली याक्सले कप्तान सोमपाल कामीसँगै सात खेलाडीलाई ‘रिटेन’ गरेको जानकारी दिएको छ। कर्णालीका लागि सोमपाल नै मार्की खेलाडी रहेका छन्। 

त्यस्तै, गुल्सन झा, नन्दन यादव, दिपक डुम्रे, पवन सर्राफ, युवराज खत्री र युनिष विक्रम सिंह ठकुरीलाई पनि कर्णालीले ‘रिटेन’ गरेको छ। 

एनपीएलमा सात खेलाडीलाई ‘रिटेन’ गर्न सक्ने व्यवस्था छ। अन्य खेलाडी अक्सनबाट अनुबन्ध गर्नुपर्नेछ। 

कर्णालीले अर्जुन घर्ती, दीपेन्द्र रावत, इमरान शेख र विपिन खत्रीलाई ‘रिलिज’ गरेको छ। गत संस्करणमा टिममा रहेका सबै खेलाडी कर्णाली याक्सको लागि उतिकै महत्त्वपूर्ण रहे पनि नियम अनुसार रिलिज गर्नुपर्ने भएकाले उनीहरूलाई रिलिज गरिएको कर्णाली याक्सका निर्देशक ज्ञानेन्द्र मल्लले बताए। 

कर्णाली याक्स गत संस्करणमा छैटौँ स्थानमा रहेको थियो।