२४ वर्षपछि फेरि हलमा फर्किँदै ‘ये दिल आशिकाना’

 रोमान्टिक–एक्सन थ्रिलर फिल्म ‘ये दिल आशिकाना’ फेरि हलमा फर्किने भएको छ । भ्यालेन्टाइन डेको विशेष अवसर पारेर फिल्म फेरि रिलिज हुन लागेको हो । सन् २००२ मा प्रदर्शन भएको यो फिल्म २४ वर्षपछि आगामी फेब्रुअरी १३ मा पुनः रिलिज हुन लागेको हो । निर्माण पक्षले रिलिज घोषणा गर्दै फिल्मको नयाँ ट्रेलर समेत सार्वजनिक गरेको छ ।

‘ट्रु इन्टरटेनमेन्ट प्राइभेट लिमिटेड’ ले ‘ये दिल आशिकाना’ लाई फेब्रुअरी १३ देखि प्रदर्शन गर्न लागेको हो । फिल्मका निर्देशक कुकु कोहलीले फिल्म ठुलो पर्दाकै लागि बनेको बताए । उनले भने– ‘सन् २००२ मा दर्शकहरूले जसरी यो फिल्म हेरेका थिए, आजको नयाँ पुस्ताले पनि त्यसरी नै हेर्ने मौका पाउँदा आफूलाई खुसी लागेको छ ।’

करण नाथ र जिविधा शर्मा मुख्य भूमिकामा रहेको यो फिल्मको कथा करण र पूजाको प्रेमको वरिपरि घुम्छ । जब आतंकवादीहरूले पूजा सवार विमान अपहरण गर्छन्, करणले आफ्नो ज्यान जोखिममा राखेर उनलाई बचाउँछन् । तर पछि उनले पूजाको आफ्नै भाइ पनि ती आतंकवादीहरूमध्ये एक भएको थाहा पाउँछन् । १८ जनवरी २००२ मा पहिलो पटक प्रदर्शन भएको यो फिल्म नदीम–श्रवणको कर्णप्रिय सङ्गीतका कारण बक्स अफिसमा सफल भएको थियो ।

फिल्ममा करण नाथ र जिविधाका अलवा आदित्य पञ्चोली, अरुणा इरानी, जोनी लिभर र रजत बेदीको मुख्य भूमिका छ । फेब्रुअरी १३ मै शाहिद कपूरको नयाँ फिल्म ‘ओ रोमियो’ पनि प्रदर्शनमा आउँदैछ । यी दुवै फिल्म एक अर्कोसँग भिड्नेछन् ।