बालुवा, गिट्टीमा लकडाउन अवधीको कर छुटको माग

सुखड - कैलालीको घोडाघोडी नगरपालिका बिरुद्ध उच्च अदालत दिपायलमा मुद्धा परेको छ ।

नगर भित्रको प्राकृतिक श्रोत अन्तर्गत बालुवा, गिट्टी संकलनको जिम्मा पाएको रेखा निर्माण सेवाले नगर सरकार बिरुद्ध असार ४ गते मुद्धा दायर गरेको हो ।

कोरोना भाईरस रोकथामका लागि सरकारले घोषणा गरेको लकडाउन अवधिमा बालुवा तथा गिट्टी संकलनको काम नभएको र सोही अवधिको हुन आउने कर छुटको माग सहित उच्च बदालतमा मुद्धा दायर गरेको रेखा निर्माण सेवाका संचालक जनक शाहीले बताए ।

कर छुटका लागि बारम्बार नगर सरकालाई निबेदन दिदा समेत कुनै सुनुवाई भएन । उनले भने,लकडाउनका कारण करिब ४० लाख बराबरको कर संकलन हुन सकेन ।

सरकारले समस्यामा परेका ब्यवसायिहरुलाई सहयोग गर्नुको साटो झन समस्यामा पार्न थालेकाले न्यायको खोजीमा हिडेको छु ।

जिल्लाको गोदावरी नगरपालिका, धनगढी उप–महानगरपालिका लगायत छिमेकी पालिकाहरुले प्राकृतिक श्रोतमा लकडाउन अवधिको कर छुट गरेको दाबि गर्दै उनले घोडाघोडीले पनि सोही अभ्यास अवलम्बन गर्नु पर्ने बताए ।

तर यता घोडाघोडी नगर सरकारले भने देशमा घोषणा गरिएको लकडाउन अवधिमा पनि बालुवा, गिट्टी संकलनको काम नरोकिएको दाबि गरेको छ ।

लकडाउनमा पनि बालुवा, गिट्टी संकलन जारी रहेको र सोही अवधीमा नगर भित्र ८५ प्रतिशत भौतिक निर्माणको काम भएको भन्दै प्रमुख प्रशासकिय अधिकृत खगेन्द्र बहादुर सिंहले उक्त कर रकम छुट गर्न नसकिने बताए ।

नगरपालिकाले दिएको १ सय ६३ वटा रसिद ठेली नगरलाई बुझाएको भए घाटा लागेको बिषयमाकार्यपालिकामा छलफल वा निर्णय गर्न सक्ने अवस्था हुन्थ्यो । उनले भने, हाल सम्म पनि उक्त ठेलीहरु नगर सरकारलाई प्राप्त भएका छैनन् ।

वास्तविक कर संकलनको लेखाजोखा नै नगरी लकडाउनलाई अवसर बनाई निर्माण सेवाले हचुवाकै भरमा मुद्धाको प्रक्रियामा अघि बढेको उनको भनाई छ ।

माथि उल्लेख गरिएका छिमेकी पालिकाहरुले लकडाउन अवधिमा बालुवा, गिट्टी संकलन बन्द गरेकाले कर छुट गरेको हुन सक्ने अधिकृत सिंह बताउछन ।

नगर भित्रको प्राकृतिक श्रोत अन्तर्गत बालुवा, गिट्टी संकलनका लागि रेखा निर्माण सेवाले १ करोड ४७ लाखमा ठेक्का सम्झौता गरेको थियो ।

तेश्रो किस्ता अन्तर्गतको ४४ लाख १० हजार रुपैया नगरपालिकाले छुट गर्नु पर्ने निर्माण सेवाको माग छ भने निर्माण सेवाले दोश्रो किस्ताको पुरा रकम समेत नदिएको नगरपालिकाको भनाई छ ।

निर्माण सेवाले सम्झौता अनुसार पहिलो किस्ता ४० लाख दिएको छ भने दोश्रो किस्ता अन्तर्गत हुन आउने ६२ लाख ९० हजार रुपैया मंसिर मसान्त र तेश्रो किस्ताको रकम फल्गुन मसान्तमा बुझाउने सहमती भएको थियो ।

तर दोश्रो किस्ताको ३० लाख रुपैया असार ८ गते दिएको तथा दोश्रो किस्ता वाफतको ३२ लाख ९० हजार र तेश्रो किस्ताको पूर्ण रकम नगरपालिकामा प्राप्त नभएको कार्यकारी अधिकृत सिंहले जानकारी दिए ।