विपदको रमिता हेर्न भीआईपीको लावालस्कर, चुनावको तयारी कि निजी लोकरिझ्याइँ ?

काठमाडौं । राष्ट्रपति रामचन्द्र पौडेलले ३५ जनाको लावालस्कर लगाएर युरोपका तीनवटा देशमा १० दिनसम्म सयर गर्ने रहर सार्वजनिक आलोचनाका कारण सम्भव भएन ।

जाजरकोट र रुकुम अहिले शोकाकुल छ । गाउँका गाउँ तहसनहस भएका छन् । परिवारै सखाप भएका छन् । साना नानीहरु टुहुरा छन् । वयोवृद्ध बुवाआमाको कमाएर खुवाउने सहारा खोसिएको छ । अन्नपात सबै माटोमा मिसिएको छ । बस्नका लागि एक बित्ता ओत छैन । यो चिसोमा कहाँ गएर रात काट्ने ? सबै सुकुमवासीजस्तै भएपछि छिमेकमा गएर केही रात र केही छाक काटौँ भन्ने अवस्था छैन । बाँच्नेहरुमध्ये सबैको हालत उही र उस्तै छ ।  

सुरूको दिन प्रधानमन्त्री पुष्पकमल दाहाल एक हुल सांसद र मन्त्रीहरू लिएर प्रभावितस्थलमा पुगे । त्यसपछि गृहमन्त्री नारायणकाजी श्रेष्ठको टोली विपद पर्यटनमा निस्कियो ।

स्थानीय जनप्रतिनिधिहरूको भनाइमा अहिले भूकम्पप्रभावित क्षेत्रमा भीआईपी भ्रमण र भाषण चाहिएको छैन । त्यहाँको मुख्य समस्या भनेको त्रिपाल र कम्बल हो। किनभनेचिसो निकै बढेको छ। बेलुका टिक्न गाह्रो हुन्छ। पालिकाको तर्फबाट केही त्रिपाल, कम्बल वितरण गरे पनि प्रभावित बढी भएकाले पुगेको छैन । कतिपय बस्ती विकट ठाउँमा छरिएका छन्।

यही क्षेत्रमा फेरि भूकम्प जान्छ भनेर विज्ञहरुले भनिरहेका छन् । प्रधानमन्त्री, उपप्रधानमन्त्री, मन्त्रीहरु, सांसदहरु, मुख्यमन्त्रीहरु आए, अवलोकन गरे । छिटो गर्न निर्देशन दिए । नीतिगत कुरा गरे । तर, मुख्य गाँठी कुरा प्रक्रियामा जाँदा ढिलाइ नहुने गरी विधि फुकाउन कसैले ध्यान दिएका छैनन् । उनीहरु रमिता हेरेर मात्र फर्किएका छन् ।