नेपाली ब्रोलाई थप ५ दिन हिरासतमा राख्न अदालतको अनुमति

काठमाडौँ । ‘नेपाली ब्रो’ भनेर परिचित कुमार थापालाई थप ५ दिन हिरासतमा राखेर अनुसन्धान गर्न अदालतले प्रहरीलाई अनुमति दिएको छ । 

पत्नी ईश्वरी भुजेलको हत्या आरोपमा पक्राउ परेका थापालाई बुधबार काठमाडौँ जिल्ला अदालतका न्यायाधीश पिताम्बर शर्माले दोस्रो पटक ५ दिन हिरासतमा राखेर अनुसन्धान गर्न अनुमति दिएका हुन् । यसअघिको म्याद सकिएपछि प्रहरी वृत्त बालाजुले उनलाई अदालतमा उपस्थित गराएको थियो ।

जेठ २२ मा राति थापाले पत्नी भुजेलको हत्या गरेको प्रहरीको प्रारम्भिक अनुसन्धान निष्कर्ष छ । हत्यामा संलग्न आरोपमा थापाकी प्रेमिका सहित थप ३ जनालाई पक्राउ गरेर प्रहरीले अनुसन्धान गरिरहेको छ ।

मृतक भुजेल नेपाली सेनाकी सुवेदार हुन् । घरायसी विवादमा उनको हत्या भएको प्रारम्भिक अनुसन्धानबाट खुलेको जिल्ला प्रहरी परिसर काठमाडौँका एसपी पवन भट्टराईले रातोपाटीलाई बताए । उनले भने, ‘दुई जनाको बिचमा अत्यन्तै कटुतापूर्ण सम्बन्ध रहेको देखिन्छ।’