मन्त्रिपरिषद् पुनर्गठन हुँदै : को–को छन् मन्त्री बन्ने रेसमा ?

सुदूरपश्चिम प्रदेशमा नेपाली कांग्रेसभित्र दलको नेता परिवर्तनलाई लिएर देखिएको विवाद मन्त्रालय भागबण्डामा सहमति जुटेसँगै अन्त्य भएको छ ।

 

मुख्यमन्त्री कमलबहादुर शाह र सांसद दिवानसिंह विष्ट पक्षबीच भएको समझदारीअनुसार सरकारमा रहेका दुई राज्यमन्त्रीसहित पाँच मन्त्री हेरफेर गर्ने तयारी गरिएको छ ।

 

सहमति अनुसार आर्थिक मामिला मन्त्रालय मुख्यमन्त्री शाह पक्षले राख्नेछ भने सामाजिक विकास तथा उद्योग, पर्यटन, वन तथा वातावरण मन्त्रालय विष्ट पक्षले पाउनेछ ।

 

मन्त्री र राज्यमन्त्रीको नाम टुंगो लगाउन दुवै पक्ष आन्तरिक छलफलमा जुटेका छन् ।

 

शाह पक्षबाट विक्रमसिंह धामी, डम्मरी महरा र मधु भारती मन्त्रीको दौडमा छन् ।

विष्ट पक्षबाट पदम शाही, मानबहादुर रावल, बेलबहादुर राना, गीता चौधरी, ललिता सुनार र तुलसी देवकोटामध्येबाट समावेशी प्रतिनिधित्व मिलाएर मन्त्री चयन गर्ने तयारी छ ।

विष्टले आफू मन्त्री नबन्ने बताइसकेका छन् ।

दुवै पक्षले आइतबार नाम टुंग्याएर सोमबारसम्म मन्त्रिपरिषद् पुनर्गठन गर्ने तयारी गरेका छन् ।