ओली र कोइरालाको सहकार्यले दाहाल र देउवाको गठबन्धन भत्किन सक्ला ?

यो समाचार बर्णन मिडियाका प्रधान सम्पदक तथ संचालक नारायण प्रसाद दाहाल ज्युले लेख्नु भएको हो।

काठमाडाैँ।कोशी प्रदेशमा नेपाली कांग्रेसका केदार कार्कीले ८ सांसदसहित विद्रोह गरे । मौजुदा सत्ता गठबन्धनलाई लोप्पा खुवाउँदै प्रमुख प्रतिपक्षी दल नेकपा एमालेसँग मिलेर सरकार बनाए ।  

हुन त कार्की मुख्यमन्त्री नियुक्त भएलगत्तै सत्ता गठबन्धनका केही नेताले बालुवाटारमा भेला भएर मौजुदा सत्ता गठबन्धनलाई यथावत् राख्न दृढ रहेको लिखत पनि नगरेका होइनन् । प्रधानमन्त्री एवं माओवादी अध्यक्ष पुष्पकमल दाहाल प्रचण्ड, कांग्रेस सभापति शेरबहादुर देउवा र अर्का नेता शेखर कोइरालाले एक चिर्कटोमा हस्ताक्षर गरी एक बुँदे सहमति नै भएको सार्वजनिक गरे । तर, त्यस चिर्कटो सहमति २४ घण्टा पनि टिकेन।

शनिबार चिर्कटोमा हस्ताक्षर गरेर ठूलै षड्यन्त्र परास्त गर्न सफल भइयो भन्ने प्रचण्ड आइतबार छोरीको प्रशंसामा रमाए । कोशीका मुख्यमन्त्रीले शपथ लिएपछि कुनै राजनीतिक टिप्पणी गर्ने साहस देखाएका छैनन् ।

तर अनौठो पक्ष के छ भने कोशीको धक्काले प्रचण्डलाई जति तनाव पुगेको छ, त्यसले कांग्रेसका महामन्त्रीद्वय गगन थापा र विश्वप्रकाश शर्मालाई पनि उत्तिकै तनावग्रस्त बनाएको छ । थापाले कांग्रेसको माओवादीकरण वा एमालेकरण दुवै स्वीकार्य नहुने बताएका छन् भने विश्वप्रकाश शर्माले घरमा ठाकठुक हुँदैमा छिमेकीसँग लहसिनुहुँदैन भनेर उपदेश दिएका छन् ।  

कोशीमा कांग्रेसकै एक समूहले गरेको विद्रोहलाई सभापति देउवाले सहज रुपमा लिएका छन् तर उपसभापति खड्का र महामन्त्रीद्वयलाई निकै असहज भएको छ । जबकि देउवालाई संसदीय दलमा चुनाव हराउने घोषणा गरेका महामन्त्रीहरु अहिले उनीहरुकै अनुकूल परिस्थिति बन्दा किन खुसी हुन सकेनन् त ? 

एमाले अध्यक्ष केपी शर्मा ओली र कांग्रेसका शेखर कोइरालाको रोहबरमा भएको सहमतिमा प्रदेशदेखि राष्ट्रिय सरकार निर्माणमा समेत मिलेर अघि बढ्ने प्रतिबद्धता जनाइएको छ । एमालेलाई बाहिर राखेर देशले स्थिरता पाउँदैन र विकास पनि हुँदैन भन्ने शेखर पक्षको बुझाइ छ । यस खालको रणनीतिक साझेदारीले तत्कालको सत्ता गठबन्धन मात्र खल्बलिएको छैन, कांग्रेसभित्रको समीकरण पनि उल्टिने संकेत गरेको छ ।