त्रिशूली नदीमा हामफालेर बेपत्ता भएका भनिएका (म्यानेजर) निरञ्जन देवकोटालाई ३५ दिन भित्र कार्यालयमा उपस्थित हुन सूचना!

बैंकले एक पत्रिकामा सूचना जारी गर्दै देवकोटालाई ३५ दिनभित्र बैंकमा हाजिर हुन भनेकाे हो। ‘बैंकको स्वीकृतिविना बैंकलाई कुनै जानकारी नदिई कार्यालयमा अनुपस्थित रही हालसम्म पनि बैंकमा गैर हाजिर रही सम्पर्कमा नआउनु भएको एवं बैंकले खोजी गर्दासमेत फेला पार्न नसकेकाले सार्वजनिक सूचना जारी गरिएको छ,’ बैंकले साेमबार जारी गरेको सूचनामा भनिएको छ,  ‘३५ दिनभित्र कार्यालयमा अनुपस्थित हुनुको कारण र प्रमाणसहित बैंकमा उपस्थित हुन आउनुहोला, अन्यथा बैंकले तपाईं उपर बैंकका कर्मचारी सेवा बिनियमावली बमोजिक बैंकको सेवाबाट हटाउन लागि प्रक्रिया अघि बढाउने छ।’

१५ असोज २०८० मा देवकोटा त्रिशूली नदीमा हाम फालेर बेपत्ता भएका भनिएको थियो। त्यसयता उनी सम्पर्कमा आएका छैनन्। उनको स्थिति अझै अज्ञात छ। त्रिशूलीमा हेलिएको भनिएको ७ महिना बित्दा पनि परिवारले न त उनको सास पाएको छ, न त लास नै। त्यतिबेला ३८ वर्षीय देवकोटा धादिङको गजुरी गाउँपालिका वडा नम्बर ५, घाटबेसीस्थित नयाँ पुलबाट त्रिशूलीमा हाम फालेर बेपत्ता भएको बताइएको थियो। 

उनले चढ्दै आएको बा.प्र. ०३–००५प ४१७६ नम्बरको एभेन्जर मोटरसाइकल भने त्रिशूलीको पुलमै भेटिएको थियो। देवकोटा त्रिशूलीमा हाम फालेको भन्ने खबर पाएपछि जिल्ला प्रहरी कार्यालय धादिङले ठूलो संख्यामा गोताखोरसहितको टोली लगाएर झण्डै एक महिनासम्म उनको खोजी गरेको थियो। तर उनलाई फेला पार्न सकेको थिएन। 

निरञ्जन मेगा बैंक, हेटौंडा शाखामा प्रबन्धकको पदमा कार्यरत थिए।  मेगा बैंक र नेपाल इन्भेस्टमेन्ट बैंक गाभिएर इन्भेस्टमेन्ट मेगा बैंक भएपछि उनीमाथि मोटो रकम हिनामिनाको आरोप लागेको थियो। बैंकले देवकोटाको विषयमा अनुसन्धान थालेको विषय हेटौंडा शाखाबाटै चुहिएपछि त्यहाँका ग्राहकहरूलेसमेत उनीविरुद्ध उजुरी हाल्न थालेका थिए। 

उनीहरूले ऋण स्वीकृत गर्दा कमिसन लिएका केही प्रमाणहरू पेस गरेका थिए। बैंकले पनि उनलाई स्पष्टीकरण सोधेको थियो। सोही स्पष्टीकरण दिन उनी सो दिन काठमाडौं गएको पारिवारिक स्रोतको दाबी छ।