टी–२० अलराउन्डर वरीयतामा दीपेन्द्रलाई अहिलेसम्मकै उत्कृष्ट रेटिङ

काठमाण्डाै – आईसीसी टी–२० अलराउन्डर वरीयतामा नेपाली राष्ट्रिय टोलीका सदस्य दीपेन्द्रसिंह ऐरीले अहिलेसम्मकै उत्कृष्ट रेटिङ प्राप्त गरेका छन् ।

अन्तर्राष्ट्रिय क्रिकेट काउन्सिल (आईसीसी) ले सार्वजनिक गरेको पछिल्लो विवरणमा दीपेन्द्र २५६ रेटिङसहित चौथो स्थानमा उक्लिएका हुन् । यसअघि दीपेन्द्र टी–२० अलराउन्डर वरीयताको दोस्रो स्थानसम्म उक्लिए पनि रेटिङ यति धेरै पुगेको थिएन ।

यो वरीयतामा जिम्बावेका सिकन्दर राजा शीर्ष, भारतका हार्दिक पान्ड्या दोस्रो र पाकिस्तान सइम अयुब तेस्रो स्थानमा छन् ।

यस्तै टी–२० ब्याटिङ वरीयतामा कुशल भुर्तेल ६ स्थान सुधार गर्दै ६०औँ स्थानमा उक्लिएका छन् । यो वरीयतामा भारतका अभिषेक शर्मा शीर्ष, भारतकै ईशान किशन दोस्रो र पाकिस्तानका शाहिबजादा फरहान तेस्रो स्थानमा छन् ।

यस्तै टी–२० बलिङ वरीयतामा सन्दीप लामिछाने ९ स्थान सुधार गर्दै ४९औँ, दीपेन्द्रसिंह ऐरी १५औँ स्थान सुधार गर्दै ६२औँ स्थानमा उक्लिएका छन् । यो वरीयतामा अफगानिस्तानका राशिद खान शीर्ष, भारतका वरुण चक्रवर्ती दोस्रो र पाकिस्तानका अब्रार अहमद तेस्रो स्थानमा छन् ।