काठमाडौँमा सुनको सिक्री लुटपाट गर्ने गिरोह पक्राउ

काठमाडौँ उपत्यका अपराध अनुसन्धान कार्यालयले सुनको सिक्री लुटपाट गरी बिक्री गर्ने कार्यमा संलग्न एक गिरोहलाई पक्राउ गरेको छ।

तारकेश्वर नगरपालिका वडा नम्बर ८ स्थित जरङ्खुमा भएको लुटपाटको घटनामा संलग्न व्यक्तिहरूलाई विभिन्न स्थानबाट नियन्त्रणमा लिइएको प्रहरीले मंगलबार जनाएको छ।

गत जेठ ११ गते अपराह्न करिब ५ बजेतिर बाटोमा हिँडिरहेकी एक महिलाको घाँटीमा लगाइरहेको सुनको सिक्री स्कुटरमा आएका दुई जना अपरिचित व्यक्तिहरूले थुतेर (स्न्याचिङ) फरार भएका थिए। 

उक्त घटनाको अनुसन्धानका लागि खटिएको प्रहरी टोलीले सीसीटीभी फुटेज र अन्य सुराकीका आधारमा संलग्न व्यक्तिहरूको पहिचान गरी पक्राउ गर्न सफल भएको हो।

पक्राउ पर्नेहरूमा धादिङ घर भई हाल तारकेश्वर–७ बस्ने २० वर्षीय एनोस तामाङ र नुवाकोट घर भई हाल तारकेश्वरमै बस्ने १९ वर्षीय लाक्पा तामाङ रहेका छन्। प्रहरीले एनोसलाई लोलाङ र लाक्पालाई तिनपिप्लेबाट पक्राउ गरेको हो। यस घटनामा संलग्न अन्य आरोपीहरूमा हेमन्त तामाङ र शुक्रकुमार पात्र समेत रहेका छन्।

प्रहरीले उनीहरूको साथबाट वारदातमा प्रयोग गरिएको एउटा स्कुटर, लुटिएको धनमाल बिक्रीबाट प्राप्त ७५ हजार ८ सय रुपैयाँ नगद र विभिन्न कम्पनीका ३ थान मोबाइल फोन बरामद गरेको छ।

कार्यालयका सूचना अधिकारी प्रहरी उपरीक्षक रामेश्वर कार्कीले पक्राउ परेका व्यक्तिहरूमाथि थप अनुसन्धान र कानुनी कारबाहीको प्रक्रिया अगाडि बढाइएको जानकारी दिए।