हुलाकलाई व्यावसायिक बनाउन सरोकारवालाको जोड

 काठमाडौँ १७ वैशाखः  :  हुलाक सेवालाई सेवासँगै व्यावसायिक बनाउनुपर्नेमा सरोकारवालाले जोड दिएका छन् । हुलाक सेवा विभागको आयोजनामा हुलाक निर्देशनालय कास्कीअन्तर्गतका १७ जिल्लाका हुलाक कार्यालयका प्रतिनिधि र सरोकारवालाबीच आज आयोजित अन्तरक्रियाका सहभागीले हुलाकलाई सेवाका रुपमा मात्र अगाडि बढाउँदा यसको सुदृढीकरण नहुने बताएका हुन् ।
 
हुलाक सेवालाई कागजात मात्र बोक्ने कार्यालयका रुपमा हेर्दा यसको महत्व र गरिमा घट्दै गएको सहभागीको टिप्पणी छ । अन्तरक्रियामा बोल्दै जिल्ला समन्वय समिति गोरखाका प्रमुख मोहनबहादुर थापामगरले हुलाक कार्यालय रुग्ण उद्योग जस्तै बनेको बताउनुभयो । उहाँले सेवाग्राहीले विश्वास गर्ने स्तरको बनाउन सुझाव दिनुभयो । देश सङ्घीय संरचनामा जाँदा समेत हुलाक अझै विसं २०२८ सालको संरचनामा चलिरहेको उहाँको भनाइ थियो ।

“हुलाकलाई अब व्यावसायिक बनाएर अगाडि लैजानुपर्छ,” प्रमख थापामगरले भन्नुभयो, “राज्यको लगानी चार अर्ब हुने र आम्दानी ३० करोड हुने स्थितिले हुलाक चल्न सक्दैन ।” गोरखा नगरपालिकाका नगरप्रमुख कृष्णबहादुर रानामगरले आधुनिक सञ्चार प्रविधिको विकाससँगै हुलाक सेवा साँघुरिँदै गएकाले हुलाकले सेवालाई आधुनिक बनाउनुपर्नेमा जोड दिनुभयो । 

“हुलाक सञ्चारको एक महत्वपूर्ण माध्यम हो,” उहाँले भन्नुभयो, “सञ्चारमा भएको विकाससँगै हुलाक सेवा बृहत हुँदै जानुपर्ने थियो त्यसो हुन सकेन ।” उहाँले हुलाक सेवालाई पुनःसंरचना गरी व्यवस्थित रुपमा सञ्चालन गर्न सके सरकारीस्तरबाट सुलभ सेवा दिनसक्ने बताउनुभयो । हुलाक सेवाले दिने प्रकृतिको सेवा बजारमा निजी क्षेत्रले दिएर मनग्य आम्दानी गरेकाले हुलाक व्यवस्थित गर्न सके निजी क्षेत्रभन्दा उत्कृष्ट सेवा जनतालाई दिन सकिने उहाँले बताउनुभयो । 

“हुलाक सेवामा काम नहुने र कर्मचारीसमेत पदोन्नतिका लागि अध्ययन गर्न हुलाक कार्यालयमा सरुवा जाने प्रवृत्ति सुनिन्छ,” उहाँले भन्नुभयो, “यसले हुलाक कार्यालयप्रतिको आकर्षण घटाएको अनुभूति हुन्छ, हुलाकमा जाने कर्मचारी फुर्सद मिलाउन नभई काम गर्न जाने सोचको विकास गर्नु जरुरी छ ।”

त्यस्तै, गोरखाका निमित्त प्रमुख जिल्ला अधिकारी श्रीनाथ पौडेलले हुलाक सेवालाई प्राधिकरणमा लैजाने वा विभागअन्तर्गत राख्ने भन्नेमा स्पष्ट नीतिगत व्यवस्था गरेर पुनःसंरचना गर्नुपर्ने बताउनुभयो । 

हुलाक सेवा विभागका निर्देशक ध्रुवराज आर्चायले हुलाक सेवाले इतिहास बोकेको भए पनि वर्तमानलाई पछ्याउन नसकेको स्वीकार्नुभयो । “हुलाक सेवा कि खारेज हुने हो वा सच्चिएर, जाने हो भन्ने अवस्था छ,” उहाँले भन्नुभयो, “यी दुई विकल्पमध्ये एउटा विकल्प रोज्नै पर्ने अवस्थामा अहिले हुलाक सेवा पुगेको छ ।”

कार्यक्रममा नेपाल पत्रकार महासङ्घ गोरखा शाखाका कार्यवाहक अध्यक्ष नरेन्द्र ढकालले प्रेस काउन्सिल र सूचना विभागले गर्दै आएको पत्रपत्रिका दर्ता, नवीकरण, लोककल्याणकारी विज्ञापन उपलब्ध गराउने काम हुलाकले गर्नसक्ने गरी सेवा दिनुपर्ने बताउनुभयो ।