सरकारले लगानी सम्मेलनको घोषणा गरेका बेला बाहिरिँदै विदेशी लगानी, एनसेलबाट आजियाटा बाहिरिँदा के असर गर्छ ?

नेपालको अर्थतन्त्र मन्दीमा गएको दुई वर्ष भयो । यो अवधिमा विदेशी लगानी भित्रिने त परको कुरा स्वेदशमै लगानीको वातावरण भएन । उद्योग, व्यवसायी हात  उठाएर बसेका छन् । नेपालमा लगानीको वातावरण रहेको र लगानीमैत्री अवसर सृजना गर्ने भन्दै सरकारले आगामी वैशाखमा लगानी सम्मेलनको घोषणा गरेको छ । आगामी ९ र १० वैशाखमा तय भएको तेस्रो लगानी सम्मेलन विदेशी लगानीमा मात्रै केन्द्रित नभएर स्वदेशी, गैरआवासीय नेपालीलाई पनि लक्षित गर्न खोजिएको छ । 

मन्त्री महतले सक्षम लगानीकर्तासमक्ष प्रस्ताव राख्ने, त्यस्तो लगानीकर्ताको लगानी सुनिश्चित गर्ने तथा लगानी प्रतिबद्धतालाई अनुगमन (फलोअप) गर्ने र रियलाइजेसन गर्ने उद्देश्य रहेको बताइरँदा नेपालमा ठूलो लगानीकर्तामध्येको एउटा आजियाटा समूहले एनसेलबाट हात झिक्ने घोषणा गरेको छ । 

एनसेलबाट बाहिरिने उद्देश्यका साथ आजियाटाले यसको सम्पत्ति बिक्रीमा राखेको बुधबार जारी एक विज्ञप्तिमा उल्लेख छ । एनसेलको सम्पत्ति बिक्रीमा राखिएकाले यो आर्थिक वर्षको हालसम्म आजियाटाको खुद घाटा १ अर्ब ३० करोड मलेसियन रिंगिट पुगेको कम्पनीका ग्रूप सीईओ तथा प्रबन्ध निर्देशक विवेक सूदले गरेको प्रस्तुतिमा उल्लेख छ । एनसेलको ८० प्रतिशत सेयर ७ वर्ष अगाडि टेलियासोनेराबाट आजियाटाले किनेको थियो ।

प्रबन्धक निर्देशक सुदले ‘नेपालमा चुनौती थपिँदै गएकोले बोर्डले नेपालबाट बाहिरिने निर्णय गरेको र सोहीअनुसार एनसेललाई बिक्रीमा राखिएको’ बताएका छन् ।  नेपालमा चुनौती रहेको भनेपनि उनले नेपालमा एनसेलले व्यावसायिक बाहेक अन्य कस्तो चुनौतीको सामना गर्यो भन्ने विषयमा खुलाइएको छैन ।