देश विपदमा हुँदा राष्ट्रपति पौडेव १० करोड खर्चेर किन युरोप घुम्न जाँदै छन् ?
देश अहिले राष्ट्रिय विपदमा छ । इजरायलमा हमास समूहको आक्रमणमा परी १० जना नेपाली विद्यार्थीले ज्यान गुमाइसकेका छन् भने एकजना विपिन जोशीलाई हमासको नियन्त्रणबाट मुक्त गर्न सकिएको छैन । यस प्रकरणमा सरकारको कूटनीतिक कमजोरी पनि छताछुल्ल भएको छ । किनभने सुरुमै उत्तेजक अभिव्यक्ति नदिएर कतारमार्फत् पहल गरेको भए हमासले नेपाललाई तारो बनाउन सक्थ्यो र क्षति पनि कम गर्न सकिन्थ्यो । अन्य शक्तिराष्ट्रहरूले पनि कूटनीतिक पहलमार्फत् कतिपय आफ्ना नागरिक मुक्त गरेका छन् । त्यसतर्फ नेपालको ध्यानै छैन ।
देशका लागि आवश्यक ठाउँमा हुनुपर्ने पहलकदमीका ठाउँमा यो हालत छ । तर हाम्रा राष्ट्रपति रामचन्द्र पौडेल भने कात्तिक २२ गते १० दिने युरोप भ्रमणमा जाँदै छन् । बिहीबार बसेको मन्त्रिपरिषद् बैठकले उनको भ्रमण स्वीकृत गरिसकेको छ । फ्रान्सको राजधानी पेरिसमा एउटा एनजीओले गर्न लागेको ‘पेरिस पिस फोरम’मा भाग लिन जान लागेका उनले जर्मनी र इटालीको पनि भ्रमण गर्ने तालिका तय गरिएको छ । युरोपका तीन देश घुमेर मंसिर १ गते मात्र उनी स्वदेश फर्किने कार्यक्रम छ ।
यस्तो बेलामा राष्ट्रपति विदेश भ्रमणमा नहुने भनेर सामाजिक सञ्जालमा उनको तीव्र आलोचना भइहरेको छ । पूर्वराष्ट्रपति विद्यादेवी भण्डारीका सल्लाहकार टीकाप्रसाद ढकालले समेत भ्रमण स्थगन गर्नु उचित हुने बताएका छन् ।
गाजामा इजरायल–प्यालेस्टिनी तनाव चर्किएका बेला कतारी राजाले नेपाल भ्रमण स्थगन गरेको सन्दर्भ स्मरण गराउँदै उनले सामाजिक सञ्जालमा लेखेका छन्-
‘निकै पर गाजामा युद्ध हुँदा कतारका राजाले हाम्रा प्रधानमन्त्रीबाट नै घोषणा गरिएको पूर्वनिर्धारित नेपाल भ्रमण स्थगन गर्नुभएको ताजै छ। एक हप्ता पनि बितेको छैन। आज हाम्रा राष्ट्रपतिज्यूलाई विनम्रतापूर्वक मेरो अनुरोध छ– हस्तिनापुरलाई अचानक भूकम्पले नराम्ररी क्षतिग्रस्त तुल्यायो । धृतराष्ट्र बन्नबाट जोगिने ठूलो उपाय छ– भोलि कि पर्सदेखि हुने भनिएको युरोप भ्रमणमा नजाने घोषणा गर्नुहोस् । तीन देशको भ्रमणमा हुने करिब १० करोड बराबरको खर्च भूकम्प प्रभावित जनताको राहत र उद्धारमा लगाउने घोषणा गर्नुहोस् । यसबाट थोरै भए पनि गणतन्त्रको इज्जत बच्छ । युरोपेली मित्रहरू लोकतान्त्रिक हुन्, उनीहरूले कुरो बुझिहाल्छन् । यस्तो बेला भ्रमणमा निस्कँदा आतिथेय मुलुकमा न मुलुकको प्रतिष्ठा बढ्दछ, न हाम्रो गणतन्त्रको।’
हालै मात्र प्रधानमन्त्री पुष्पकमल दाहाल १५ दिनसम्म अमेरिका र चीन घुमेर करिब ३० करोड रुपैयाँ सकेका थिए । अहिले राज्यको ढुकुटीबाट १० करोड रुपैयाँ सकेर राष्ट्रपति पौडेल युरोप घुम्न जाँदै छन् । एउटा गरीब देशका लागि योभन्दा ठूलो विडम्बना के हुन सक्छ ?
यसै पनि रिगल र रेशम चौधरीहरुलाई गम्भीर मानवताविरोधी अपराधमा पनि राजनीतिक पक्षधरताका आडमा माफी दिँदा यो संस्था बदनाम भइरहेको छ । अदालतले समेत राष्ट्रपतिको नैतिकतामाथि प्रश्न उठाइरहेको छ । त्यसमाथि देशै विपदमा फसेका बेला पौडेलको युरोप घुम्ने रहर उनीभित्र शासकीय निरंकुशता र संवेदनहीनता पराकाष्ठामा पुगेको देखिन्छ । यसले जनतामा व्याप्त असन्तुष्टि र वितृष्णालाई अझै विष्फोटक बनाउने निश्चित छ ।
प्रतिक्रिया