पृथकतावादी नेता निज्जरको हत्या आरोपमा तीन भारतीय पक्राउ

 क्यानडा प्रहरीले एक सिख पृथकतावादी नेताको हत्यामा संलग्न तीन भारतीय नागरिकलाई पक्राउ गरेको  जनाएको छ । पृथकतावादी नेता हरदीप सिंह निज्जरको हत्या आरोपमा २२ वर्षीय करण बरार, २२ वर्षीय कमल प्रीत सिंह र २८ वर्षीय करण प्रीत सिंह पक्राउ परेको क्यानडा प्रहरीले जनाएको छ ।

तीनै जनालाई क्यानडाको एक सहर अल्बर्टाको एडमन्टनबाट प्रहरीले पक्राउ गरेको हो । उनीहरु विगत कम्तिमा तीनवर्षदेखि क्यानडामा बस्दै आएका थिए । पक्राउ परेका तीनै जनालाई हत्या र हत्याको षड्यन्त्र गरेको आरोप लगाइएको छ । पक्राउ परेका माथि छुट्टाछुट्टै अनुसन्धान भइरहेको छ।

यस्तै, उक्त हत्यामा अरु पनि संलग्न हुन सक्ने र थप पक्राउ वा मुद्दा लाग्न सक्ने प्रहरीले जनाएको छ । गत वर्षको जुनमा क्यानडाको भ्यानकुभर नजिकै बन्दुकधारीले ४५ वर्षीय निज्जरको गोली हानी हत्या गरेका थिए । निज्जरको हत्यापछि भारत र क्यानडाबिच ठुलो कूटनीतिक विवाद उत्पन्न भएको थियो ।

निज्जरको हत्यापछि क्यानडाका प्रधानमन्त्री जस्टिन ट्रुडोले यसमा भारतको संलग्नता रहेको आरोप लगाउँदै आफूसँग यथेष्ट प्रमाण रहेको बताउँदै आएका थिए । तर, भारतले उनको आरोपे अस्वीकार गर्दै आएको छ । प्रहरीले भारत सरकारसँगको सम्बन्धसहित अनुसन्धान जारी रहेको जनाएको छ ।